850.000 euros en axudas para rehabilitación de vivendas da ARI Ribeira Sacra

O DOGA publicaba este xoves, 23 de febreiro, a resolución do 21 de febreiro pola que se declara a área de rehabilitación integral (ARI) da Ribeira Sacra, á que a Xunta destinará 850.000 euros en axudas.

Casa para rehabilitar en Sober/Concello de Sober

Coa ARI da Ribeira Sacra melloraranse as vivendas situadas nas parroquias e nos núcleos de poboación dos concellos incluídos na mesma, que presentan edificacións en estado de abandono ou sen un mantemento adecuado, así como a mellora das instalacións públicas, vías de comunicación ou espazos relacionados.

A primeira convocatoria, que terá un orzamento de 850.000 euros, está actualmente en tramitación e prevese publicar no próximo mes de maio, para presentar ante o Instituto Galego dá Vivenda e Solo (IGVS).

A ARI da Ribeira Sacra comprende un total de 25 concellos das provincias de Lugo e Ourense: Bóveda, Carballedo, Castro Caldelas, Chandrexa de Queixa, Chantada, Esgos, Manzaneda, Monforte de Lemos, Montederramo, Nogueira de Ramuín, Pantón, Parada de Sil, Paradela, A Peroxa, A Pobra de Trives, A Pobra do Brollón, Portomarín, Quiroga, Ribas de Sil, San Xoán de Río, O Saviñao, Sober, Taboada, A Teixeira e Xunqueira de Espadañedo. Os 25 concellos teñen un total de 433 parroquias, cunha superficie de 2.990 quilómetros cadrados.

Casa onde estaba a antiga cantina de Piño / XdL

A Administración autonómica concederá axudas aos propietarios das vivendas para a súa rehabilitación así como aos concellos que a conforman para a realización de obras de urbanización e reurbanización no ámbito da ARI.

Os propietarios dos inmobles poderán obter ata un máximo de 16.000 euros por actuación, mentres que as axudas aos concellos están condicionadas polo número de vivendas que se rehabiliten no seu municipio, recibindo ata 2.000 euros por vivenda rehabilitada.

O obxectivo inicial da ARI é a rehabilitación de polo menos 2.000 vivendas durante o seu dez primeiros anos de vixencia, a parte das obras de urbanización e reurbanización que realicen os concellos.

DEIXAR UN COMENTARIO

Please enter your comment!
Please enter your name here