“O corredor Sarria-Monforte é un goteo diario de desgrazas”, Claudio Garrido

O concello de Sarria anuncia que tentará crear unha fronte común para convertir o corredor Lugo-Monforte en autovía.

Corredor Lugo-Sarria-Monforte

O alcalde de Sarria, Claudio Garrido, lamenta que o corredor que comunica Lugo con Monforte de Lemos converteuse “nun goteo diario de desgrazas”, despois de ter o segundo accidente con consecuencias graves en pouco máis dunha semana, polo que anuncia que tentará crear unha fronte común para a súa conversión en autovía.

Un veciño do Corgo resultou a última hora da tarde de onte ferido de gravidade ao chocar a camioneta que conducía cun camión e hai pouco máis dunha semana perdía a vida noutro accidente un residente en Samos. “É bochornoso que, coa sinistralidade que presenta o corredor, non se asuma a realidade”, dixo Garrido, quen opina que facer “o desdobramento en autovía por fases, co que se demora a tramitación para cada tramo, é unha tomadora de pelo para os cidadáns”.

Garrido fixo un “chamamento aos alcaldes” afectados para convocar unha reunión e crear unha fronte común no que se refire á esixencia de desdobrar o corredor en autovía, algo que algúns rexedores locais veñen reclamando “desde o ano 94 ou 95”. “Ten que ser unha esixencia”, dixo o rexedor local de Sarria, porque ante a elevada sinistralidade hai que adoptar “medidas drásticas”.

DEIXAR UN COMENTARIO

Please enter your comment!
Please enter your name here