A Consellería de Cultura e Turismo concede axudas por importe de 279.500 euros a dez concellos das comarcas de Quiroga, Chantada e Terra de Lemos para o desenvolvemento de actuacións de recuperación, accesibilidade e sinalización dos recursos turísticos no medio rural.
No sur lucense obtiveron achegas todos os municipios que a solicitaron, e dous proxectos acceden á contía máxima: unha área de lecer na zona do albergue de Quiroga, e un estacionamento nas proximidades da mina romana de ouro dos Medos na Pobra de Brollón. Tamén se financiarán intervencións en Bóveda, Sober, O Saviñao, Ribas de Sil, Pantón, Folgoso do Courel, Monforte de Lemos e Chantada.
Esta liña de subvencións, convocada en novembro, incrementa o orzamento e introduce unha nova fórmula administrativa cos concellos que a solicitaron, pola que pasarán a xestionarse a través de convenios para axilizar a tramitación. Con estas achegas búscase poñer en valor a riqueza histórica, cultural, patrimonial e paisaxística dos destinos rurais. O importe máximo da subvención que se aboa aos concellos é do 85 % do orzamento do investimento subvencionable, co límite máximo de 30.000 euros.
As achegas para a mellora de infraestruturas turísticas no rural buscan o embelecemento o recurso así como a mellora da contorna, principalmente en aspectos básicos como a accesibilidade e a sinalización.
Así, sufráganse accións como a recuperación de elementos de interese etnográfico ou da arquitectura tradicional, iluminación ornamental, miradoiros paisaxísticos, estacionamentos, vías, ocultamento de colectores e cables, e eliminación de barreiras arquitectónicas, entre outras.