O 50 aniversario da ‘Noite Meiga” de Sarria quedará para 2021

A Asociación Cultural Meigas e Trasgos vén de facer un comunicado público no que informa da suspensión desta tradicional celebración, festexo que este ano alcanzaba os 50 anos.

Noite Meiga / Asociación Cultural Meigas e Trasgos

A Directiva barallaba organizar a Noite Meiga aínda que fose unha celebración máis recollida e íntima, con todas as medidas de seguridade, pero despois das últimas novidades sobre a Covid-19 consideran que o máis sensato é non celebrala e esperar ao 2021.

“Ninguén o lamenta máis que nós, pero Sarria merece que o 50 aniversario sexa celebrado cunha festa á súa altura e este ano non pode ser así. O noso pesar é profundo pero a nosa responsabilidade aínda o é máis, e non hai mellor vacina que o sentido común”, expresan dende a súa páxina de Facebook.

Así mesmo informan que as posibles actividades realizadas por O Meigallo -local situado nas súas instalación- durante esas datas, son totalmente alleas á Asociación Meigas e Trasgos e a responsabilidade de calquera posible celebración recaerá sobre os empresarios que xestionan dito local.

Cada último sábado de agosto a vila de Sarria celebra esta velada máxica no Parque do Chanto. Coa colaboración do concello, dende hai anos encárgase da organización a Asociación Cultural Meigas e Trasgos, unha entidade moi comprometida tamén co folclore e as diferentes manifestacións culturais do país.

DEIXAR UN COMENTARIO

Please enter your comment!
Please enter your name here