Sober forma en prevención da violencia contra as mulleres

Faranse catro charlas informativas nunha acción cofinanciada polo Fondo Social Europeo e polo Pacto de Estado Contra a Violencia de Xénero.

igualdade Sober / Concello de Sober

O Concello de Sober forma ás auxiliares de axuda a domicilio na prevención da violencia contra as mulleres e a favor da igualdade. A primeira das catro charlas tivo lugar este martes, no marco dunha acción cofinanciada polo Fondo Social Europeo e polo Pacto de Estado Contra a Violencia de Xénero.

Lentes Lilas

Cada día centos de mulleres maiores sofren abuso psicolóxico, físico, económico e sexual. Tendo en conta a súa idade, presentan un grao de dependencia xeralmente maior, son máis vulnerables e atópanse nun maior risco de abuso, neglixencia, chantaxe, abandono, falta de seguridade,… Para loitar contra esta lacra, e co obxectivo de crear conciencia social sobre a vulnerabilidade e os riscos ós que se enfrontan as mulleres maiores emerxe ‘Lentes Lilas’. 

Con este traballo preténdese aumentar o coñecemento e a sensibilización sobre o fenómeno da violencia de xénero contra as mulleres maiores e resaltar as necesidades e dificultades específicas que presenta este tipo de maltrato co fin de provelas de maior protección en situacións de abuso, promover accións preventivas fronte a situacións de risco e facer as súas vidas diarias máis seguras.

igualdade Sober / Concello de Sober

Con estas xornadas o Concello de Sober: 

  • Dará visibilidade a esta problemática a fin de concienciar, sensibilizar, informar e formar ás Auxiliares de Axuda no Fogar do Concello de Sober.
  • Promulgará novas formas de actuación a través de enfoques que contemplen a perspectiva de xénero.
  • Aumentará a sensibilización sobre o fenómeno da violencia contra as mulleres.
  • Establecerá redes de apoio social e iniciativas de autoaxuda para aumentar os niveis de seguridade e solidariedade nos domicilios aos que acoden.
  •  Difundirá, de forma directa e indirecta, a todo o Concello de Sober a mensaxe de traballar en prol da igualdade e na prevención da violencia contra as mulleres.

Programación formativa e informativa

Dando resposta a esta necesidade, no Concello de Sober decídese poñer en marcha unha programación informativa e formativa que consta de catro sesións impartidas por unha educadora social co obxectivo de dotar ás Auxiliares de Axuda no Fogar de ferramentas que as capaciten para a detección e identificación de situacións de violencia cara as mulleres no marco do seu ámbito de actuación. 

DEIXAR UN COMENTARIO

Please enter your comment!
Please enter your name here