O delegado territorial da Xunta en Lugo, Javier Arias, fixo entrega dos diplomas aos 20 alumnos traballadores que se formaron no obradoiro de emprego Serra do Faro V, compartido por Carballedo e Chantada, nun acto no que tamén participaron os alcaldes de ambos concellos, Julio Yebra e Manuel Lorenzo, respectivamente.
Os participantes reciben un certificado de profesionalidade que os acredita para exercer traballos na especialidade elixida -albanelaría ou xardinaría-, ben como asalariados en empresas do sector ou como traballadores por conta propia, dado que tamén adquiren coñecementos específicos orientados ao emprendemento.
En Chantada traballaron na instalación e mantemento de zonas verdes como a contorna do paseo fluvial do río Asma dende o campo do Sangoñedo ata o núcleo da Ponte, o parque Eloisa Rivadulla ou a Praza de Galicia. Tamén melloraron as beirarrúas neste último punto -no tramo do xulgados- e na Avenida de Monforte, así como os pavimentos na zona das pistas de tenis. No caso de Carballedo, acondicionaron os accesos e a área recreativa da Barrela e remodelaron a zona axardinada da praza do Concello, entre outras.
O delegado sinalou que próximamente dará comezo unha nova edición deste proxecto, “que suporá novas oportunidades laborais para outras 20 persoas desempregadas destes municipios”. A Consellería de Emprego e Igualdade destinará 368.000 euros á iniciativa, que xunto coa que agora remata eleva o investimento a preto de 745.000 euros nos dous últimos anos.