As mochilas están compostas por cadernos, lapis, ceras, gomas, compás, regras, material de debuxo para os máis pequenos, dispositivos informáticos (pen drives, etc.), etc; e ademais este ano tamén inclúen máscaras e portamascarillas adaptadas a cada ciclo educativo.
A entrega levouse a cabo no CPI San Tomé do Carballo, por conta de Jesús Busto, Director Xeral de Fundación Amigos de Galicia; Doce Mª Montes Gómez, Concelleira de Educación de Taboada; o director do centro escolar, Alfredo Abraiga, e os socios da Fundación Amigos de Galicia da zona, entre eles Pepe Ramos e Haizam Farid.
“Ao comezo do curso escolar, hai menores que non contan con todo o material escolar que necesitan, por atoparse as súas familias en situación de carencia de recursos económicos. Dado que unha das actuacións principais da Fundación Amigos de Galicia é a cobertura de necesidades básicas das familias en situación de dificultade económica, especialmente daquelas que teñen menores a cargo, a entidade está a levar a cabo a campaña “Nas súas mochilas ou seu futuro”, co obxectivo de poder entregar mochilas con todo o material que os menores necesitan”, asegurou Jesús Busto.
A entidade tamén quixo aproveitar o acto para agradecer a “boa acollida da campaña que estamos a recibir entre a cidadanía galega, non só a través das doazóns de material escolar, senón tamén coas doazóns sen contacto recibidas a través da web; así como de persoas voluntarias que colaboraron nas campañas de sensibilización entre a cidadanía. Cabe destacar que estas entregas de material escolar que a entidade desenvolverá ao longo de todo o mes en diferentes municipios de Galicia para repartir 974 mochilas, son posibles pola colaboración de entidades, empresas e persoas que están a colaborar na campaña “Nas súas mochilas, ou seu futuro”.
Amigos de Galicia traballa contra a fenda dixital
En materia de apoio escolar á infancia, a entidade conta ademais cun programa de dixitalización que xorde como consecuencia do elevado número de solicitudes recibidas por parte de familias galegas con menores a cargo, que non contan cos dispositivos informáticos nin coa conexión a internet que estes necesitan para seguir o curso académico en igualdade de condicións que o resto dos seus compañeiros/ as. Unha situación que pon de manifesto que o déficit dixital concéntrase nos colectivos máis vulnerables da nosa sociedade.
Para colaborar coa campaña establécense varias posibilidades:
- Doazón sen contacto: Cunha achega económica a través da web da entidade, comprando unha das tres mochilas tipo.
- Doazón de material escolar novo nalgún dos puntos de recollida habilitados para as doazóns; e que tamén están reflectidos na páxina web da entidade.
- Voluntariado: Doando tempo e axudando á entidade para preparar as mochilas; así como colaborando nas campañas de sensibilización para que teña o maior alcance posible.
- Doazón a través de BIZUM: seleccionando facer un donativo e poñendo o código 02735.