Dende este martes 23 de novembro está en marcha o obradoiro “En liña coa igualdade” dirixido ao alumnado de 6º educación primaria e organizado polo Concello de Monforte dentro do seu programa de actividades arredor do 25-N.
Caracterízase polo seu carácter práctico e de traballo en equipo no que se analizan o uso das redes sociais, a visión da adolescencia nas redes (a importancia da imaxe, a hipersexualización infantil en internet…) así como as consecuencias negativas que a mesma provoca nos nenos, nenas e adolescentes.
A formadora é Noelia Rodríguez Álvarez, unha educadora social con ampla formación e experiencia en igualdade que tras analizar os conceptos anteriormente sinalados traballará “aquilo que amosa a rapazada nas redes sociais e a rede de contactos que acceden a estes contidos”.
CONCURSO DE BELÉNS
A Concellería de Cultura do Concello vén de convocar un Concurso de Beléns no que poderán participar os centros educativos de Monforte, podendo presentarse só un belén por centro.
As solicitudes de inscrición para a participación no certame poderán presentarse no Rexistro Xeral do Concello de Monforte, sendo o derradeiro día o 15 de decembro ás 14:00 h. Todas aquelas solicitudes presentadas fóra deste prazo serán desestimadas calquera que sexa a causa do seu atraso.
O xurado cualificador do concurso visitará os centros participantes o 16 de decembro. A súa decisión será inapelable tras valorar tres aspectos das elaboracións: a orixinalidade, o traballo e a presentación artística. Os premios faranse públicos aos medios de comunicación este mesmo día.
O xurado estará composto por:
-Presidente: A Delegada de Cultura ou persoa á que designe.
-Vocais: Persoas relacionadas coa cultura local.
-Secretario: O técnico de Cultura do Concello de Monforte, con voz e sen voto, que certificará o cumprimento das condicións establecidas nas bases do concurso.
O xurado terá liberdade de criterio para establecer as súas cualificacións, sendo os criterios a valorar os seguintes: a montaxe, a elaboración, os materiais utilizados, a orixinalidade, o interese etnográfico e a calidade do belén.
PREMIOS
Haberá un primeiro, un segundo, un terceiro premio e un accésit. Se o xurado o considera oportuno poderá conceder dous primeiros, dous segundos, dous terceiros premios ou tres accésits, sempre que a suma total dos premios concedidos no concurso non supere os 510 euros.
Os premios serán indivisíbeis e poderá quedar deserto algún deles, segundo a decisión do xurado do concurso. Así, o 1º premio estará dotado con 100 euros, o 2º premio con 80, o 3º premio con 50 e o accésit con 30.