O CIM de Chantada continúa coas actividades do 8M esta fin de semana

O Auditorio Municipal acollerá o día 19 unha conferencia sobre educación ‘en sexualidade’ e o domingo 20 proxectarase a película ‘Frozen 2’.

Salón de actos do Auditorio Municipal. Acto organizado por Polamiúda en nov. 2021. Foto: Polamiúda.

Tras varias actividades arredor do 8M para conmemorar o ‘Día Internacional da Muller’, esta fin de semana hai programadas dúas moi interesantes. Unha primeira terá lugar o sábado, 19 de marzo, ás 12:00 h. no Auditorio Municipal e consistirá nunha conferencia que, baixo o título Como lle falo “diso”?, abordará a educación de nenas e nenos en sexualidade. Dende o Concello de Chantada recomendan que se asista con cativas e cativos de máis de 12 anos e informan que “será unha charla de aproximadamente dúas horas de duración dirixida a familias, docentes e todo tipo de persoas interesadas.

A charla está impartida por Martina González Veiga, psicóloga sanitaria especializada en sexoloxía, divulgadora científica, fundadora e directora do centro de sexoloxía Con mucho gusto, mestra en diferentes masters e colaboradora habitual de medios de comunicación con seccións semanais coma o “Consellos con Sexo” no programa da Radio Galega “Galicia por diante” presentado polo chantadino Kiko Novoa.

Imaxe cedida

E xa o domingo, 20 de marzo, o Auditorio Municipal acollerá ás 18:00 h. a  proxección de Frozen 2 dentro do ciclo “Mulleres de Cine”. Este filme apto para todos os públicos, e dirixido especialmente para a infancia, está codirixido por unha muller, Jennifer Lee, que tamén é guionista. Está protagonizado por mulleres valentes, seguras e fortes coma Elsa e Anna que emprenden unha viaxe perigosa para coñecer as súas orixes. A película fala da sororidade, de mulleres valentes, da familia, da importancia da amizade e de ser unha mesma.

DEIXAR UN COMENTARIO

Please enter your comment!
Please enter your name here