O 14 de marzo de 2020, decretouse o Estado de Alarma motivado pola pandemia do Covid-19 que supuxo, entre outras cousas, o peche das instalacións deportivas. Desde o concello fóronse abrindo paulatinamente as instalacións deportivas municipais, dacordo coas indicacións sinaladas polas autoridades sanitarias, e nas que se priorizaba a práctica de deporte federado.
“Tras a volta á normalidade, dende o Equipo de Goberno de Monforte, consideramos que é o momento de recuperar o aluguer das instalacións deportivas para a práctica de deporte de tempo libre e non federado por parte dos veciños e veciñas que así o desexen” destacou José Tomé.
A reserva de instalacións para a práctica deportiva non organizada realizarase obrigatoriamente a través da plataforma de reservas online habilitada na páxina web do Concello de Monforte. Tamén se pode facer a través da app Sporttia, dispoñible para Android e iOS.
As instalacións deportivas ofertadas para o seu alugueiro son o Campo Municipal de Fútbol Luís Bodegas, en horario de luns a venres non festivos entre as 17:30 e as 22:30, e o Pavillón Municipal da Pinguela, de luns a venres non festivos entre as 16:00 e as 22:30 h.
As tarifas polo alugueiro dos diferentes espazos deportivos son as seguintes:
• Campo Municipal de Fútbol Luis Bodegas:
- Campo de Fútbol 7: 15,45 € / hora
- Campo de Fútbol 11: 30,90 € / hora
• Pavillón Municipal da Pinguela:
- Cancha completa: 12,36 € / hora
- Media cancha: 6,18 € / hora