Yolanda, de ‘Cafés de Sofá’: “Cada vez a xente entende máis de café”

O café nunca pasa de moda e as infusións están gañando moito terreo entre as preferencias dos consumidores. Yolanda Varela sábeo e apostou por abrir un comercio especializado en Monforte de Lemos.

Sabela e Yolanda Varela, a xerente de 'Cafés de Sofá' / XdL

En Galicia sempre fomos moi cafeteiros, pero as infusións están cada vez máis presentes, tanto na hostalería como no consumo doméstico. O gusto polo café e o seu consumo diario fai tamén que cada vez sexamos máis esixentes e busquemos un produto natural e de calidade. “Cada vez a xente entende máis de café e preocúpase pola calidade do produto”, dinos Yolanda Varela, emprendedora monfortina que abriu en maio do 2020 ‘Cafés de Sofá’, un negocio especializado en cafés e infusións.

A tenda, na Rúa Doutor Teixeiro de Monforte de Lemos / XdL

Respecto dos tés e das infusións, pois á vista está, o crecemento constante no mercado é xa unha realidade. A pandemia e a incorporación do mercado masculino ao consumo deste tipo de bebidas axudou en gran medida a aumentar a demanda.

Falamos con Yolanda Varela.

Que buscan ‘de especial ou diferente’ os clientes e as clientas no teu comercio?

O habitual é que busquen un café de calidade e diferente porque cada vez máis clientes buscan para comer produtos de calidade e diferentes.

“O habitual é que busquen un café de calidade e diferente”

Notas que a xente entende de cafés ou falta moito por coñecer deste mundo en xeral?

Cada vez a xente entende máis de café e preocúpase pola calidade do produto que compra.

Aquí, logo, está a importancia do teu labor. Non só é vender, se non informar e prescribir o mellor café para cada momento e persoa. Cóntanos.

Intentamos aconsellar preguntando o tipo de gusto de cada consumidor e aconsellarlle o café que lle pode ir mellor, explicando as características de cada café.

Que cafés teñen máis saída na túa tenda e cales recomendarías para probar?

Sen dubidalo, os cafés naturais. Cada vez gustan máis. Eu recomendaría calquera natural pero temos un blend arábica que é unha mestura de Colombia, Costa Rica, Etiopía e Brasil.

Dispensadores de café a granel / XdL

Aínda que o café é un gran clásico para os galegos e galegas, están a gañar terreo as infusións. Tamén o notas? Supoñemos que tes tamén unha ampla gama delas. Cóntanos.

As infusións están gañando terreo, nós temos todo a granel. Nestas infusións vese a clara diferenza porque nótanse as follas e vese todo o que levan.

“As infusións están gañando terreo, nós temos todo a granel”

Cafés, infusións e máis cousas tamén…

Si, ademais de café e infusións teño diferentes doces, chocolates, bombóns, conservas de orixe galego, etc.

Chocolates / XdL

Notas que veña ao teu comercio xente de fóra de Monforte?

O turismo que visita a Ribeira Sacra tamén se empeza a notar a nivel clientela.

DEIXAR UN COMENTARIO

Please enter your comment!
Please enter your name here