Comeza a mellora de tres estradas provinciais en Pantón e da estrada que une Vilachá coa Estación da Pobra do Brollón

A Deputación de Lugo acaba de comezar os traballos de mellora do firme de tres estradas provinciais que transcorren polo termo municipal de Pantón. Unhas actuacións nas que inviste preto de 170.000€ e que benefician á LU-P-4110, LU-P-4111 e LU-P-4114.

Obras estrada privincial LU-P-4110 Pantón / Deputación Provincial

As obras das estradas provinciais en Pantón consisten na rehabilitación integral do firme en treitos que suman en total 18 quilómetros e o prazo de execución é de 5 meses, aínda que se poderían rematar antes se as previsións meteorolóxicas son favorables. As actuacións desenvólvense na LU-P-4110, que conecta Arribada, na parroquia de San Fiz de Cangas, con Budián, en San Romao de Acebre, nun tramo de algo máis de 5 quilómetros, entre os puntos quilométricos 0 e 5,051.

As obras tamén benefician á vía LU-P-4111, que comunica Santiago de Castillón desde Ferreira de Pantón, nun tramo de máis de 9 quilómetros, entre os núcleos de Santa Mariña de Eiré e Marce. Neste caso mellórase o treito comprendido entre o quilómetro 0 e o 9,294. A terceira das vías provinciais incluídas neste proxecto é a LU-P-4114, que une Mañente con Augas Santas, pasando por Toldaos, nun treito de preto de 4 quilómetros, entre os puntos quilométricos 0 e 3,539.

A Deputación subliña a importancia destas actuacións porque son vías moi utilizadas a diario polos veciños e veciñas do concello de Pantón e de localidades limítrofes, e que contribuirán á mellora das comunicacións na Ribeira Sacra.

Comeza a mellora da estrada que conecta Vilachá coa Estación da Pobra do Brollón

A Deputación de Lugo comezou este venres novos traballos de acondicionamento de oito quilómetros da estrada provincial LU-P-4702, que conecta Vilachá coa Estación da Pobra do Brollón por Rozavales. As actuacións, que contan cun orzamento de 82.280€, lévanse a cabo entre o punto quilométrico 2,570 ata o 10,400, e consisten na reapertura de cunetas e posterior pavimentación e sinalización horizontal.

Con estas obras, e tras a renovación xa acometida entre os puntos 1,200 e 2,400, a estrada quedaría rehabilitada practicamente na súa totalidade, dende o punto quilométrico 1,200 ao 10,400.

Obras estrada provincial LU-P-4702 / Deputación Provincial

DEIXAR UN COMENTARIO

Please enter your comment!
Please enter your name here