Un millón de euros da Deputación para abrir este ano a residencia de Ribas de Sil

A Deputación de Lugo licita por un importe conxunto de case 1M€, os contratos para a dotación de equipamento da residencia, que sae a contratación por 332.000€, e para a prestación dos servizos básicos, cun orzamento de 610.000€.

Concello de Ribas de Sil / torbeo.com

O contrato de equipamento divídese en cinco lotes: mobiliario xeral; equipos médicos e axudas técnicas; lavandería; cociña; e cortinaxe. O prazo de entrega do material, unha vez asinado o contrato, será de dous meses. No caso das prestacións básicas, o período de vixencia do contrato irá dende o vindeiro mes de setembro ata xuño do 2023, coa opción de tres prórrogas anuais. “Son dous pasos determinantes para poder poñer en funcionamento a residencia de Ribas de Sil”, apuntou García Porto.

En convenio co concello de Samos, a Deputación aportará ao concello 205.730€ para acometer a mellora dos accesos aos núcleos de Lastres, Bustofrío, Gosende e Outonín; para renovar a pavimentación da vía que conecta A Veiga e Sivil e do camiño de Lulle a San Román; e para a renovación do abastecemento de auga en Vilaceite e Lamartín.

A Xunta de Goberno aprobou concorrer a una nova liña de axudas de fondos europeos para o financiamento de proxectos innovadores impulsados por entidades locais que teñan como obxectivo a transformación territorial, a reactivación da actividade socioeconómica e a loita contra o despoboamento.

A Deputación presentará unha solicitude de medio millón de euros a esta convocatoria para desenvolver un proxecto de carácter demostrativo, que consistirá na creación de tres oficinas técnicas noutros tres puntos distintos da provincia, “dende as que se prestará asesoramento gratuíto e soporte a proxectos tractores que reactiven a actividade socioeconómica e que fomenten a creación e o desenvolvemento de ecosistemas de intelixencia e innovación territorial”.

“En cooperación cos respectivos concellos, as oficinas servirán como punto de apoio local para a atracción de novos veciños e veciñas, e servirán tamén de acollida e integración da poboación migrante, e para impulsar actuacións dirixidas ao desenvolvemento económico endóxeno”, detallou a Deputada.

DEIXAR UN COMENTARIO

Please enter your comment!
Please enter your name here