Festival solidario en Monforte o 2 de novembro coa orquestra Panorama

A cita terá lugar na explanada da Compañía, o venres 2 de novembro ás 23.00 h. O obxectivo principal é facer unha recollida de alimentos non perecedoiros para axudar ás familias máis necesitadas.

Orquestra Panorama / orquestasdegalicia.es

A solidariedade, ás veces necesita un gancho e o éxito da Panorama parece ser un reclamo interesante para esta finalidade. A orquestra de moda en Galicia, propiedade do monfortino, Carlos Somoza, actuará de balde para animar a que a xente colabore. A orquesta xa ten feito outros concertos solidarios por outros motivos, como a loita contra o cancro.

Na explanada da Compañía colocarase unha carpa para que o público que vaia ao concerto deposite as súas aportacións. Solicítanse alimentos non perecedoiros, principalmente de carácter infantil. Os alimentos recollidos serán distribuidos despois por Cáritas e Cruz Vermella.

Na presentación desta iniciativa solidaria, o alcalde de Monforte, José Tomé, sinalou que os servizos sociais son piares da xestión do equipo de goberno e animaba aos veciños a entregar alimentos,  especialmente azúcar, aceite, galletas, cereais, conservas ou cacao, entre outros.

DEIXAR UN COMENTARIO

Please enter your comment!
Please enter your name here