Na xornada, organizada polo Instituto Galego do Consumo e da Competencia, tratouse o tema do subministro básico, o bono social e axudas complementarias e informouse así mesmo sobre os detalles da factura eléctrica e as medidas de aforro enerxético que poden adoptar os usuarios para diminuír os custos enerxéticos.
O delegado territorial da Xunta en Lugo, José Manuel Balseiro, participou nesta xornada xunto coa Asociación Provincial de Amas de Casa e Consumidores Lucus –na sede deste colectivo- e subliñou que “é imprescindible abordar medidas que garantan que todos os cidadáns poidan disfrutar deste subministro básico, o que está a ser unha prioridade para a Xunta de Galicia”.
Balseiro agradeceu a colaboración de entidades como a asociación Lucus que están acollendo estas sesións informativas en distintos puntos da provincia, sesións que “axudan a que a información chegue ás persoas interesadas”. Lembrou tamén que se ofrece información sobre a materia nas páxinas web do Instituto Enerxético de Galicia –Inega- e do Instituto Galego do Consumo e da Competencia, así como tamén nas oficinas da Delegación Territorial da Xunta en Lugo.
Respecto ao subministro básico, a Consellería de Economía, Emprego e Industria desenvolve unha liña de axudas complementarias ao bono social do Estado que intentan evitar que se produzan cortes de subministración eléctrica nos fogares galegos.
Galicia foi a primeira autonomía en ofrecer esta liña de apoios, dirixida aos consumidores vulnerables severos en risco de exclusión social. Este ano incrementáronse en 50 euros a contía das axudas para compensar o aumento nos límites de consumo permitidos pola regulación estatal; “os apoios autonómicos, unidos aos estatais, permitirá que as familias con máis dificultades non teñan que pagar pola súa factura eléctrica”, recoñeceu José Manuel Balseiro.