Baixa o paro en Quiroga

Tras coñecer os datos de febreiro é o único concello que consegue rebaixar o número de desempregados/as. Monforte e Chantada aumentan as cifras en 5 e 10 desempregados respectivamente.

Recollida se sinaturas na Rúa Cardenal de Monforte de Lemos. Foto: Mario Docasar

A secretaria de CC. OO. Lugo vén de comunicar que o mes pasado non foi nada bo para a contratación no sur lucense ao aumentar o paro en 5 persoas en Monforte e en 10 en Chantada. Quiroga con 12 desempregados menos é a excepción da tónica negativa predominante.

A cifra de parados está en 2.614 e a precariedade laboral segue instalada nas dinámicas de contratación. Segundo afirman dende a secretaría de acción sindical 9 de cada 10 contratos realizados son temporais e o 70% dos contratos de media xornada, un clásico tamén na zona. Lembran, ademais, que dende o goberno prometeuse a derrogación da reforma laboral, causante principal da proliferación de contratos temporais, e non se cumpriu.

O sindicato considera que a maioría dos contratos eventuais fanse en ‘fraude de lei’ ao entender que para un traballo estable ou fixo contrátase a unha persoa por meses, semanas e incluso días.

As cifras de paro do mes do pasado mes de febreiro por concellos nas comarcas de Lemos, Chantada e Quiroga: Bóveda, 57 desempregados/as, Monforte 1132, A Pobra do Brollón 82, Pantón 98, O Saviñao 189, Sober 100, Carballedo 79, Taboada 114, Chantada 471, Ribas de Sil 61, Quiroga 188 e Folgoso do Courel 43.

Como balance, o secretario de acción sindical Mario Docasar denuncia as prácticas abusivas dalgunhas empresas da comarca para ‘despidos doados’ e ve con certa preocupación as cifras de contratación de mulleres ao atopar concellos como Monforte ou Ribas de Sil nos que o paro feminino é bastante maior que o masculino.

acción contra a pobreza enerxética

O sindicato comarcal de Comisións Obreiras valorou moi positivamente o apoio dos monfortinos e monfortinas na recollida de sinaturas que fixeron a pasada semana en Monforte de Lemos para esixir ao Goberno a ampliación do bono social de cara a combater a pobreza enerxética.

Recolléronse un total de 551 sinaturas en menos de 5 horas.

DEIXAR UN COMENTARIO

Please enter your comment!
Please enter your name here