Accidente laboral ou suicidio, hipóteses máis verosímiles da morte do traballador de Chantada

O xulgado instrutor espera o informe definitivo da autopsia e o da Policía Xudicial para poder sacar conclusións respecto á estraña morte desta fin de semana nunha cisterna de leite no concello de Chantada.

Camión cisterna de transporte de leite | Fonte: autoline.pe

O informe preliminar da autopsia, segundo informaron fontes xudiciais consultadas por Europa Press, “non aclara se puido ser accidente ou non”, pero tampouco parece verosímil que fose unha morte accidental “dadas as circunstancias e o lugar onde apareceu” o corpo.

Para avanzar no esclarecemento do caso, o xulgado está á espera do informe definitivo de autopsia e do informe da Policía Xudicial da Garda Civil.

O domingo pasado practicóuselle a autopsia ao corpo do traballador achado morto en tan estrañas circunstancias. Fontes da investigación explicaron que no corpo do finado “non se apreciaron causas externas de agresión”, polo que as pesquisas reduciranse a determinar, segundo os resultados da autopsia, se puido ser “un accidente laboral ou un suicidio”.

O falecido era empregado da empresa leiteira Lácteos Xabelo, veciño de Trabada, e foi atopado no interior da cisterna dun camión de leite polo dono da mesma.

DEIXAR UN COMENTARIO

Please enter your comment!
Please enter your name here