Malia a espectacularidade, e presunta gravidade dos feitos, foi o propio afectado quen contactou co 112 para pedir axuda despois de saír da auga tras precipitarse por unha das fervenzas que se poden atopar no río Soldón.
Dende ese punto, unha zona de difícil acceso, chamou ao número de emerxencias, indicoulles a súa localización e solicitou asistencia médica para asistilo do golpe que tiña na cabeza.
O persoal do centro de atención ás emerxencias pediu a colaboración dos servizos médicos e dos Bombeiros de Monforte, dos axentes da Policía Local e Garda Civil, así como dos membros do GES de Quiroga-Folgoso do Courel e de Protección Civil.
Cando os bombeiros procedían ao rescate, un equipo de Urxencias Sanitarias de Galicia-061, chegado a bordo do helicóptero medicalizado con base en Ourense, atendía xa ao ferido.