Consternación en Chantada polo asasinato dun emigrante deste concello en Venezuela

O asasinado era un piloto comercial fillo dun alcalde que ten raíces na parroquia de Santiago de Arriba.

Michel Fernández, piloto con raíces galegas asasinado en Venezuela / confirmado.ve

“Consternado”. Así di sentirse o alcalde de Chantada (Lugo), Manuel Varela, tras coñecer o crime do fillo do rexedor do municipio venezolano de Los Salias, José Fernández, con raíces no concello chantadino.

De feito, este alcalde venezolano estivo xunto coa súa súa nai a “mediados de agosto” xa que aínda conserva na vila “curmáns en segundo ou terceiro grao” na parroquia de Santiago de Arriba e contan cun piso en Chantada. Tiñan intención de quedar en Galicia ata este 24 de setembro.

Foi entón cando os dous rexedores se coñeceron. “Vino moi triste e preocupado, falando que as necesidades de Venezuela son moitas, sobre todo quería levar medicamentos”, lembra Varela. Neste sentido, o obxectivo do alcalde venezolano era falar coa Xunta para que mandara medicamentos a Venezuela xa que “non teñen nin para tratar unha dor de cabeza”.

O fillo deste alcalde dos arredores de Caracas, que era piloto comercial, foi tiroteado durante o fin de semana cando se atopaba preto da capital venezolana negociando a compra dun vehículo.  A Policía abateu, despois, aos presuntos criminais de Mitchel Fernández.

Tras o suceso, o rexedor chantadino aínda non puido porse en contacto con Fernández para transmitirlle o pésame deducindo que xa partiu cara ao seu país. “Quero facelo e aínda non dei contactado coa familia. Quero facelo para expresar o meu máis sentido pésame”, indicou.

DEIXAR UN COMENTARIO

Please enter your comment!
Please enter your name here