O condutor dun turismo resultou ferido este martes pola mañá ao perder o control do coche, que acabou por saírse da vía e envorcar. O accidente producíase na N 120 á altura do municipio lucense de Quiroga. Segundo informou o Subsector de Tráfico da Garda Civil de Lugo, o accidente produciuse ás 10:50 horas, á altura do quilómetro 503 da estrada Nacional 120. Por causas que aínda se descoñecen, o coche que conducía saíuse da vía e quedou envorcado fóra da calzada, polo que non chegou a cortar a circulación. O condutor, cuxas feridas aparentemente non eran graves, foi evacuado en ambulancia ao Hospital de Monforte.