Garda Civil e Policía Nacional buscaron a Puigdemont por Sarria

Estes corpos e forzas de seguridade do estado seguiron a pista do ‘expresident da Generalitat’ tras unha alerta da OCN (Oficina Central Nacional), contacto no estado para as actividades da INTERPOL.

Puigdemont en Bruselas. Imaxe: [EFE-EPA]

Por estraño que pareza, e segundo información que se fixo pública esta tarde a través de axencias, unha comunicación da OCN (Oficina Central Nacional), contacto no estado para as actividades da INTERPOL, alertou á Garda Civil e á Policía Nacional españolas de que o perseguido Carles Puigdemont podía estar en Sarria.

Como xa se sabe dende outubro, a Sala do Penal do Tribunal Supremo confirmou os autos do instrutor da causa do “Procés”, Pablo Llanera, de xaneiro e marzo nos que acordou manter as ordes de detención que pesan contra o ‘expresident da Generalitat’ e os exconsellers Toni Comín, Clara Ponsati e Lluis Puig.

Carles Puigdemont, actualmente eurodiputado en Bruxelas, anunciou a pasada semana que encabezaría a lista por Barcelona de Junts Per Catalunya (JxCat) ‘para axudar a Laura Borràs’ nas eleccións catalanas, que se celebrarán o vindeiro 14 de febreiro de 2020. Todo apunta a que esta última circunstancia puxo sobre aviso á INTERPOL para activar as alertas en España de cara a unha posible viaxe de Puigdemont para concretar estes detalles da candidatura.

O caso é que a información que lles chegou á Garda Civil e Policía Nacional foi que o “fuxido”, un dos armadanzas do Procés, podía achegarse a Sarria para manter contactos con políticos de Junts Per Catalunya. A primeira reacción foi de extrañeza, “non lle vimos moito sentido a que fose a vila de Sarria o lugar escollido para a xuntanza con Puigdemont”, comentaba un alto cargo da Garda Civil tras a notificación de alerta recibida. Malia as dúbidas, o protocolo obrigáballes a estar preparados para unha operación de arresto.

Seguindo instrucións, e de xeito moi discreto, a pasada semana reforzaron a vixilancia en Sarria e contorna pero non se deron indicios da posible presenza nin de Puigdemont nin de políticos/as catalás como a número un da listas de JxC, Laura Borràs.

FOI TODO UNHA FALSA ALARMA?

O que parecía ser unha falsa alarma resultou ser un malentendido, un fallo da INTERPOL que parece sacado das historietas de Mortadelo e Filemón, coñecidos axentes da TIA. Os rastreadores desta organización de policía internacional interceptaron nalgunha mensaxe de texto que Carles Puigdemont valoraba achegarse a Sarrià, e entenderon Sarria, obviando o acento. Un erro de vulto pois como sabemos, Sarrià -con til- é un coñecido barrio de Barcelona, e Sarria -sen til- unha vila do sur de Lugo.

P.D. Esta información é unha inocentada do 28 de decembro.

DEIXAR UN COMENTARIO

Please enter your comment!
Please enter your name here