Unha rapaza de 21 anos, con iniciais Y.L.O, foi evacuada esta mañá a un centro médico polo 061 tras resultar ferida nun accidente de circulación que se produciu no municipio de Carballedo.
Segundo informaron a EFE fontes do Centro Integrado de Atención ás Emerxencias de Galicia ( CIAE), o sinistro produciuse cando faltaban poucos minutos para as dez da mañá, concretamente na estrada Nacional-540, no tramo comprendido entre A Barrela e Chantada.
Por causas que aínda se descoñecen, o coche que conducía a vítima saíuse da estrada.
Para auxiliar a vítima, o 112 mobilizou aos Bombeiros de Chantada, a Urxencias Sanitarias de Galicia-061, á agrupación de voluntarios de Protección Civil de Carballedo e a persoal de Mantemento da estrada.
Tras recibir os primeiros auxilios no mesmo lugar do accidente, a moza ferida foi evacuada por unha ambulancia de Soporte Vital Básico do 061 ao Centro de Saúde de Chantada.