Urxencia médica que precisou da axuda dos bombeiros en Monforte

Unha chamada de alerta ao 112 mobilizou á Policía Local e Bombeiros de Monforte para poder entrar na casa dun home de avanzada idade que se atopaba indisposto.

Ambulancia e camión dos Bombeiros / XdL

Arredor das 19.30 h. desta noite, e tras a chamada dalgún veciño ou veciña ao 112, a Policía Local, os bombeiros e unha ambulancia do 061 chegaban á altura do número 140 da rúa Abeledos para valerlle a un señor maior que vivía só e estaba pechado no seu domicilio.

Todo apunta a que por mor dunha indisposición o home quedou medio inconsciente, feito que o imposibilitou para pedir axuda. Ao estar a porta pechada, e non podendo entrar á vivenda, foi precisa a intervención dos bombeiros que coa escada do camión chegaron ao terceiro andar do edificio e conseguiron acceder á vivenda do ancián por unha fiestra.

Ao entrar xa advertiron que perdera a consciencia e abriron a porta da súa vivenda para que os sanitarios do 061 lle valesen e o trasladaran na padiola ata a ambulancia.  Inmediatamente foi trasladado ao Hospital Comarcal de Monforte.

 

DEIXAR UN COMENTARIO

Please enter your comment!
Please enter your name here