A Diocese Mondoñedo-Ferrol propón a todas as súas homólogas que o consideren oportuno que fagan soar as campás dos templos á hora do Ángelus, co fin de convidar a orar a quen permanecen na súa casa e facer chegar a quen serven e traballan “a axuda do Señor e o agradecemento da Igrexa”.
Nun comunicado, lembrou que a Comisión Executiva da Conferencia Episcopal Española enviou unha carta, con data 15 de marzo, na que afirma que nestes días de “singular e dolorosa experiencia cidadá e eclesial, á que nos levou a pandemia do coronavirus, a Igrexa católica está chamada a ofrecer os seus recursos en favor dos afectados“.
A Diocese Mondoñedo-Ferrol acolle “de bo grado esta invitación para que se realice nas igrexas que sexa posible”. Así, cada día, ás 12:00 do mediodía e a partir do día 19, festividade de San José, soarán as campás para mostrar o seu “agradecemento e fraterna solidariedade”.
Esta diocese lembrará, así, os enfermos, os traballadores dos centros de saúde, os equipos de emerxencias e forzas de seguridade, as persoas de risco, os educadores, os que se atopan en soidade, as autoridades públicas e católicas.