O Concello de Monforte de Lemos sufriu un ciberataque que deixa a súa páxina web fóra de servizo durante polo menos dous ou tres días, xa que, aínda que á primeira hora desta xornada parecía que se resolveu o problema, posteriormente comprobouse que non era así e volveuse a pechar.
Nun comunicado aos medios, o Consistorio explicou que o ataque chega desde Rusia e inserta publicidade na web. Non habería ningún motivo en particular polo que se puido producir o ataque, trátase de ataques indiscriminados e aleatorios que buscan implantar publicidade maliciosa nas webs.
O Concello insistiu en que non se roubaron datos de ningún usuario ou cliente, nin da propia web. O ataque, detectado polos técnicos informáticos do Concello o pasado luns, provoca a aparición de publicidade non desexada na páxina de inicio da web.
A SEDE ELECTRÓNICA PÓDESE SEGUIR USANDO
Tamén recalcou que os veciños da localidade poderán seguir utilizando a Sede Electrónica para realizar os seus trámites con total normalidade, xa que esta non se viu afectada o ataque.
Segundo as comprobacións realizadas polos técnicos da entidade municipal, estímase que a web volva ao seu normal funcionamento nos próximos dous ou tres días.
