A portavoz do Grupo Municipal do PP de Monforte, Katy Varela, foi elixida presidenta da agrupación local por unanimidade, segundo informou o partido nun comunicado. A súa executiva estará formada por outras 28 persoas.
“Procurei falar con todos porque cando formas parte dun partido político, debemos lembrar que o noso fin é a participación dos cidadáns na vida democrática, velando sempre polos seus intereses. Debe, por tanto, haber certa vocación de servizo público e unha actitude de mellorar as cousas da sociedade”, explicou.
A presidenta estivo arroupada este domingo pola presidenta provincial, Elena Candia; polo vicepresidente do PP na provincia e vicepresidente segundo da Xunta de Galicia, Francisco Conde; así como por alcaldes da zona e outros cargos orgánicos, como os secretarios xeral e de organización, Javier Nodal e Javier Vázquez Prado; ou o coordinador, José Manuel Balseiro.
“Traballo, entrega e, sobre todo, xestión” fronte á propaganda é parte do que promete Varela. “Somos dos concellos cos impostos máis elevados e que menos repercute en axudas directas aos seus cidadáns”, criticou, tras o que apuntou que o partido ten a “obrigación e a responsabilidade de ofrecer unha alternativa seria e estable aos monfortinos de cara aos próximos comicios”.
Para Katy Varela, ter ao PSOE nos gobernos “nunca é rendible”, argumentando a “grave” situación que atravesa o sector do transporte, gandaría e o colectivo autónomo coa subida dos prezos e, a nivel de infraestruturas, estar “descolgados” da Alta Velocidade e “sen autovías”.
APOIO DO PARTIDO
Doutra banda, a presidenta provincial encomiou a Varela e o seu equipo e asegurou que “non todos son iguais” e que “fronte a slogans e fotos, e mesmo comentarios prepotentes ou desafortunados, o PP ofrece seriedade, rigor e traballo”. Elena Candia referiuse ademais a Monforte como “o corazón da Ribeira Sacra”; zona de “enorme potencial, pero que só ten un alcalde que o único que fai é criticar ao presidente Feijóo e que aplica unhas políticas do século XIX”.
Nesta mesma liña, Conde destacou que en todos os gobernos do PSOE “a dinámica é esconderse”. “O Goberno de Sánchez, apoiado por Tomé, non dá a cara. Aquí non se tomou ningunha medida, a pesar de que seguen ingresando todos os impostos. Como país estamos nunha illa”, lamentou.
“Pola contra, nós estamos aquí para dar solucións e facémolo apoiando a presidencia de Katy. Dedicarémonos a traballar e a sumar porque aquí todo está paralizado e iso non o podemos consentir”, defendeu o vicepresidente da Xunta.