A Consellería do Medio Rural deu por estabilizado o incendio que afecta na tarde deste mércores á parroquia de Marcelle, en Monforte de Lemos.

Segundo as últimas estimacións ofrecidas polas autoridades autonómicas a través da conta de Twitter ‘@Incendios085’, a superficie afectada polas chamas ascende a 30 hectáreas.

Na zona traballan un técnico, tres axentes, sete brigadas, tres motobombas e medios aéreos. De feito, un dos avións que participan no dispositivo sufriu un rebentón nunha roda mentres se dispoñía a cargar auga na base de Doade. Xa está a ser reparado para volver estar operativo canto antes.

É o segundo incendio forestal que sofre o sur da provincia de Lugo no que vai de semana. O pasado 29 de marzo, Medio Rural informaba de que o lume queimara case 30 hectáreas de monte en Seoane (Folgoso do Courel).