O Concello de Sarria vén de asinar un convenio coa Asociación Teavial, asociación sen ánimo de lucro que busca mellorar a autonomía e a seguridade viaria das persoas con TEA (Trastorno do Espectro do Autismo).

Grazas a este acordo de colaboración o concello terá unha nova sinalización nos pasos de peóns grazas á colocación dunha secuencia de pictogramas ordenados de forma lóxica sobre a primeira franxa branca dos mesmos.

Estes pictogramas supoñen a adaptación dos pasos de peóns ás persoas con TEA facilitando a comprensión de como se debe actuar, e mellorando por tanto a súa autonomía, ofrecéndolles un plus de seguridade ao colectivo.

Ademais, estes pictogramas cumpren outra misión moi importante: crear unhas cidades máis accesibles para todos, concienciando e empatizando sobre a diversidade, o que vai permitir tamén mellorar a convivencia de todos.

A intención do Concello de Sarria é ir poñendo progresivamente os devanditos pictogramas nos pasos de peóns de toda a vila. A primeira rúa na que se colocarán será a Rúa Xela Arias.