O saneamento de Monforte presenta carencias e deficiencias, “fronte ás que o goberno municipal presidido polo socialista José Tomé parece insensible”, sinalan desde o PP. Nesta situación, o Partido Popular leva ao pleno unha moción para intentar que o goberno local dea algúns pasos necesarios para saír da parálise neste asunto. Na moción solicitáselle ao alcalde «que se dirixa ao secretario de Estado de Medio Ambiente e ao Ministerio de Transición Ecolóxica e solicite que se garanta a asignación de fondos FEDER xestionados pola Administración central á mellora do saneamento da cidade de Monforte de Lemos».
A voceira popular, Katy Varela, explica que o seu grupo presentou en xullo pasado unha moción para que o Concello instase ao Goberno central a destinar á depuradora de Monforte fondos previstos para a de Santiago, que, por distintas causas, non podían ser executados.
Por outro lado, o grupo municipal do PP tamén defenderá no próximo pleno, unha moción en relación coa piscina municipal. Piden que o concello xestione o servizo, e se transcorrido o prazo fixado a empresa non é capaz de garantir as súas obrigas, se resolva o mesmo podéndose valorar a posibilidade de reverter o servizo co fin de facelo exclusivamente de titularidade municipal.
Varela di que a empresa incumpre cláusulas do actual contrato, entre outras, a número 30: «..son de conta do contratista…satisfacer todos os gastos que a empresa deba realizar para o cumprimento do contrato, como son…materiais, instalacións, honorarios de persoal o seu cargo…». Katy Varela considera que é posible aplicar o artigo 263 da Lei de Contratos do Sector Público que «contempla a posibilidade do secuestro temporal do contrato de explotación cando o concesionario non poida facer fronte, temporalmente e con grave dano social, á explotación da obra por causas alleas ao mesmo ou incorrese nun incumprimento grave das súas obrigas que puxeran en perigo a súa explotación».