Os asistentes a esta Festa de Interese Turístico poderán seguir gozando da posta en funcionamento do muíño de aceite tradicional, adquirir o aceite de oliva virxe extra que se produce en Quiroga e mesmo comer no recinto feiral, pero todo supeditado a unhas normas de control de persoas en todo o recinto feiral.
Segundo o rexedor local, Julio Álvarez, trátase dunha mostra cunha normativa adecuada que cumprirá as normas sanitarias decretadas polas autoridades competentes en cada momento, pero co mesmo atractivo e servizo de anteriores edicións.
Cumprindo co compromiso do Goberno Municipal de non deixar de organizar cousas para que veciños e visitantes, sempre con sentidiño, decidiuse botar adiante a organización deste evento anual para manter vivo un dos atractivos turísticos do municipio.
O recinto feiral estará aberto dende as once e media da mañá ata as dúas do mediodía. Pódese reservar entrada con cita previa, a través do teléfono 982 435125. A reserva non é obrigatoria, pero para entrar no recinto terán preferencia quen teña reserva. Con este servizo de cita previa garantirase que en cada hora (duración de cada visita) non haxa máis de 200 persoas en todo o recinto feiral.
As normas sanitarias que rexan no momento da celebración desta Mostra do Aceite cumpriranse “con orden e disciplina” segundo recalcou o alcalde de Quiroga, o que non impide que se poida poñer en marcha novamente o muíño de aceite tradicional e se abra o recinto feiral deste produto típico de Quiroga que segue loitando pola súa Denominación de Orixe.
