A plataforma Interior Galego Vivo vén de celebrar no Courel a súa IV Asemblea, na que, asegura, se “consolidou” a organización coa elección dunha Coordinadora composta por representantes das distintas agrupacións locais. “A revolta das comunidades do interior galego pola vida con dignidade no medio rural e nas vilas e cidades debe ter continuidade” a través desta asemblea, que, din, supón un “pulo organizativo” para a plataforma.

A súa proposta está centrada en garantir dereitos e calidade de vida para as persoas das comarcas do interior galego, co foco na defensa de modelos agrogandeiros sostibles e de servizos sanitarios públicos e accesibles en todo o territorio, aseguran. Para iso, anuncian que se constituirán “ao longo do verán” distintos grupos de traballo para “ampliar a proposta programática de Interior Galego Vivo”, que ao mesmo tempo está centrado no impulso á economía social e na ampliación da oferta de formación orientada á agrogandaría, transporte público ou promoción dun modelo enerxético “descentralizado e afastado da especulación e grandes impactos ambientais”.

“A Asemblea de Interior Galego Vivo aposta decididamente por propoñer modificacións lexislativas que transformen a vida da maioría social, comezando a traballar nunha proposta de fiscalidade rural que favoreza o mantemento e asentamento de poboación nos nosos municipios”, recollen nun comunicado.

No encontro, que tivo lugar este sábado no Courel, participaron movementos veciñais de diversos eidos: comunidades de montes, asociacións feministas, movementos sociais e plataformas en defensa do ferrocarril e contra proxectos eólicos invasivos. Todas elas “comprométense a continuar tecendo rede, transcendendo o local para coordinarse”, indican. “Porque entendemos que as problemáticas e solucións pasan mesmo por unha coordinación de proxectos cidadáns a nivel europeo”.