O BNG pide ao Goberno que recupere conexións en tren a San Clodio-Quiroga

Denuncian o "progresivo desmantelamento dos servizos ferroviarios na Galiza".

Un tren de RENFE parado - Arquivo

O deputado do BNG no Congreso, Néstor Rego, rexistrou unha iniciativa para que o Goberno do Estado recupere os horarios e frecuencias na estación de ferrocarril de San Clodio-Quiroga. Nun comunicado, a organización nacionalista destacou que a chegada do AVE “non pode supor a perda de conexións no interior do país e coas principais cidades que alteran e dificultan compatibilizar o transporte ferroviario cos horarios laborais”.

Ademais das modificacións e as supresións das liñas AVANT A Coruña-Ourense, remarcaron o recente anuncio que elimina a conexión polas tardes entre a estación de San Clodio-Quiroga coas cidades da Coruña e Santiago de Compostela.

“Esta decisión vén relacionada coa prioridade establecida polo executivo do Estado de adaptar todas as liñas e frecuencias ás conexións do AVE con Madrid en detrimento de as conexións internas na Galicia” denunciou Rego, que puxo como exemplo a de San Clodio-Quiroga.

“Unha viaxe de 2 horas e dez minutos desde Compostela cando a viaxe de Ourense a Madrid dura dúas horas e cuarto. Esta era unha das poucas posibilidades de chegar a Quiroga en transporte público desde cidades como Coruña ou Vigo”, asegurou.

Para os nacionalistas, trátase de “un novo recorte de servizos que segue profundando no progresivo desmantelamento dos servizos ferroviarios na Galiza, dificultando e mesmo eliminando as conexións de tren entre as principais poboacións” e “obrigando” ao uso do vehículo propio por estrada.

DEIXAR UN COMENTARIO

Please enter your comment!
Please enter your name here