Os rapaces do Incio presumen de concello

Preto de 25 rapaces e rapazas do Concello do Incio realizaron un documental sobre o seu concello, Documental do noso, co que colabora o concello na difusión.

Documental do noso / Concello do Incio

Este traballo documental realizado e protagonizado polos cativos estivo dirixido polo mestre, Jesús Somoza Fernández. No documental os rapaces amosan o orgullosos que están do lugar no que viven e reivindican o seu futuro.

O 90% dos nenos e nenas que formaron parte do documental están escolarizados no Incio e os demais pasan as súas vacacións no Concello, chegados desde Cataluña ou Madrid, entre outros puntos da xeografía española.

Os propios rapaces describen no vídeo un Concello “que valoran e queren, con naturalidade e liberdade” e fano ademais como un modo de reflexionar e facer reflexionar a quen o vexa.

Os cativos explican o motivo polo que viven no rural e os seus puntos fortes, entre os que destacan, a cultura, as tradicións, as labores cotiás, as festas, a tranquilidade ou ter sempre moitas cousas que facer. Tamén reflexionan sobre o futuro e sobre a necesidade de frear o despoboamento para o que propoñen medidas concretas.

O alcalde do Incio, Héctor Corujo, califica a experiencia como moi positiva para os nenos que se amosaron implicados e motivados para dar a coñecer o rural e as súas potencialidades.

O vídeo pódese ver aquí.

DEIXAR UN COMENTARIO

Please enter your comment!
Please enter your name here