Actividades promovidas pola área de cultura da Deputación no sur da provincia

Nos próximos días as actividades da área de cultura da Deputación en colaboración cos concellos e asociacións chegan a Monforte, Ribas de Sil, Chantada e O Incio.

Fátima Fernández / Vicepresidencia

O día 7 de abril no IES A Pinguela de Monforte, a ilustradora e debuxante de cómic Bea Lema impartirá un coloquio titulado “O proceso creativo na ilustración” ao alumnado do centro educativo. A actividade forma parte do programa ilustrarNÓS, que se puxo en marcha o pasado mes de xaneiro, coincidindo co Día da Ilustración, e que pretende ampliar o coñecemento desta expresión artística, das súas técnicas e creadores e fomentar a creatividade.

A programación inclúe unha vintena de obradoiros, charlas e intervencións artísticas en centros educativos e un certame escolar, aberto á participación de alumnado de primaria, secundaria, bacharelato e ciclos formativos. A cita de Monforte será ás 12.00 da mañá.

En Ribas de Sil o día 8 de abril ás 12.00 a narradora, Antía Vázquez, protagonizará unha sesión de contacontos dirixida ao alumnado do Ceip San Clodio, na que recreará a historia da Apalpadora, unha personaxe do Nadal que atrasou a súa chegada ata a primavera.

Concepto Circo pintará un mural en homenaxe a Rosalía de Castro no IES Lama das Quendas de Chantada. A actividade desenvolverase ao longo de todo o día 9 de abril.

A  narradora, Fátima Fernández, leva ao local social de Vila de Mouros, no Incio, “Kikiriki Cocorico”, unha sesión de contos na que os protagonista son animais que non actúan como se lles presupón: un porquiño que quere papar ao lobo, galos que poñen ovos, ratiños que buscan a primavera… E todo aderezado con cantigas, sustos e risas. A cita o día 10 de abril ás 18.00.

DEIXAR UN COMENTARIO

Please enter your comment!
Please enter your name here