A Mostra do Aceite de Quiroga busca 6 colleiteiros

O vindeiro 3 de abril remata o prazo para que os interesados/as en participar na edición deste ano formalicen a inscrición no Concello de Quiroga.

Cata do aceite na Capela das Farrapas. / Concello de Quiroga

A cultura e o cultivo do aceite na Comarca de Quiroga vai a máis, isto é unha realidade, pero o número de colleiteiros/as que poden participar no día grande de promoción e comercialización deste ouro líquido segue limitado a seis.

Dende o concello informan que o prazo para anotarse remata o vindeiro día 3 de abril e que a selección farase por rigoroso orde de inscrición no rexistro de entrada das oficinas municipais coa condición indispensable de que o aceite presentado obteña un resultado óptimo validado nunha análise química e organoléctica que realizará un laboratorio especializado.

Recinto feiral nas Farrapas de Bendilló, Quiroga. Foto: XMF

Así, pois, para poder optar a un posto o vindeiro día 12 de maio na XIX Mostra do Aceite, ademais da inscrición formal e en prazo, os interesados/as deben:

-Presentar dúas mostras de aceite, unha dun litro en envase de cristal para a análise correspondente e outra de 250 Cl para a cata previa.

-Aboar 100 euros ou un pago en especie, facilitando a cantidade de aceite equivalente a ese importe, en concepto de inscrición.

-Acreditar ter unha colleita mínima de 200 litros de aceite.

A Comisión Organizadora tamén se encargará o propio día da Mostra, domingo 12 de maio, de recoller botellas ao chou dos aceites participantes para a súa cata oficial na Capela das Farrapas, onde o Muíño de Bendilló.

Na páxina web do concello está dispoñible o formulario de inscrición.

DEIXAR UN COMENTARIO

Please enter your comment!
Please enter your name here