No 2019 pechaba en Quiroga o restaurante Ó Roxo Vivo tras 27 de anos de actividade e cun trato familiar que deixou pegada. Co local pechado, poucos podían imaxinar, incluso a propietaria Isabel Rodríguez, que a súa ‘marca’ tería unha nova vida.

Pero a situación deuse. Chegou de Madrid Unai Reboleiro para recuperar o antigo Ó Roxo Vivo e darlle unha nova oportunidade de seguir facendo felices aos comensais da contorna cunha moderna proposta gastronómica.

Unai criouse en Madrid, cidade onde emigrou o seu pai tras deixar atrás a aldea do Soldón, na montaña do Concello de Quiroga. Pero nunca perdeu o vencello con estas terras, “téñolle un amor da ostia”, confesa nunha arroutada de sentimento, e engade “nos veráns pasaba os meses de vacacións no Soldón cos meus avós, non sabía o que era a praia”.

Os seus comezos como cociñeiro hai que situalos na ‘Escuela Superior de Hostelería y Turismo de Madrid’ onde foi un dos alumnos/as coas mellores notas, logro que lle permitiu escoller destino para facer as prácticas. O restaurante escollido foi o prestixioso Hotel Restaurante Europa de Pamplona, cunha Estrela Michelín. Alí estivo un ano e medio. A continuación pasou por Toulouse, en Francia, e en Madrid, no Restaurante La Parra, antes dunha aventura en Inglaterra, no ano 2015. Neste país estivo case 3 anos no Restaurante español Barrafina, único no país cunha Estrela Michelín.

Trala aventura británica, Unai Reboleiro fichou polo Grupo Goa de Madrid, empresa na que foi responsable da parte gastronómica deseñando cartas e supervisando o traballo de máis de 30 cociñeiros/as nestes últimos tres anos. Nesta etapa foi cando lle viñeron á cabeza pensamentos de cambio ao non poder conciliar como lle gustaría familia con traballo dada a presión e a responsabilidade do seu cargo. Unai e Perla, a súa parella, teñen 2 fillos pequenos, e segundo nos conta Unai “non tiña vida, practicamente non vía nin á miña muller nin aos meus fillos”. E neste punto foi cando pensaron “que podemos facer?”…

“Nesta etapa foi cando lle viñeron á cabeza pensamentos de cambio ao non poder conciliar como lle gustaría familia con traballo dada a presión e a responsabilidade do seu cargo”.

Este verán viñeron de vacacións ao Soldón e a idea de montar restaurante en Quiroga empezou a pasarlles pola cabeza. Nun lugar como este poderían traballar xuntos, con menos estrés e poderían ter máis tempo para a vida familiar. Viron o local do antigo restaurante Ó Roxo Vivo, quedáronse coa opción, e de volta a Madrid acabaron de decidirse.

Non había volta atrás, maletas e a emprender en Quiroga, na terra de seu pai e dos seus avós. Familia e amigos/as próximos dixéronlles que “estaban tolos”, que como se atrevían nun momento como este a dar ese paso, pero Unai tíñao claro.“Nunca me gustou facer o que fai todo o mundo”, confesa dando a entender que é amigo do risco, de probar cousas e de cambiar.

“Non había volta atrás, maletas e a emprender en Quiroga, na terra de seu pai e dos seus avós”.

Preguntámoslle que referentes ten na cociña e dinos dous nomes. Non se trata de cociñeiros mediáticos pero si cociñeiros de gran nivel e que para el significan moito polo que lle aportaron. Trátase de Ángel Zapata, o chef que coñeceu no restaurante Barrafina de Londres e Arkaitz Muguruza no Hotel Restaurante Europa de Pamplona.

O ROXO VIVO, unha nova aventura

Despois desta dilatada traxectoria internacional e nacional, Unai Reboleiro chega a Quiroga, concello onde este 23 de novembro abriu as súas portas para recibir aos primeiros clientes da súa nova andaina gastronómica.

A súa aposta por Quiroga, vén dada polo amor a esta terra e por atopar un ritmo de vida que lle permita a conciliación familiar. E Perla, a súa compañeira, tamén tivo bastante que ver, gústalle moito a zona desde que a coñece e foi ela a que acabou de convencelo, segundo nos conta en confianza.

Na cociña van apostar pola tradición, son “moi amigos da culler, de encher a cociña de potas con caldos” e de “explotar o potencial da cociña galega e española”. Insisten en que dan preferencia ao produto de calidade, moi ben coidado, e que no restaurante entrarán produtos galegos de primeirísima calidade: carnes, queixos, peixe… e moi importante tamén, traballarán con adegas da zona e cos mellores produtos da horta local apostando polo comercio de proximidade.

O 23 de novembro, día da apertura, O Roxo Vivo arrincou moi ben completando o comedor. Ofrecen menús entre semana a 10 euros pero coa opción de adquirir o que chaman “tarxeta profesional” a 9 €. A opción carta promete tamén por variada e innovadora con pratos como: “Pata de polbo á grella, parmentier de pataca morada, chips de allo e maionesa de pimentón” ou “Entrecot á grella e á manteiga de romeu con pementos del Piquillo caramelizados”. Haberá que ir reservando mesa…