O Grupo Municipal de Agroma Sober acaba de presentar unha moción no concello na que propoñen unha serie de medidas para acabar co abandono de vivendas no concello. En primeiro lugar, piden a creación dun censo de edificios en risco de ruina, así como un rexistro dos núcleos rurais en situación de abandono. En segundo lugar cren que é clave impulsar de oficio os expedientes relacionados con casos perigosos e resolver os pasos a seguir canto antes (derrubo, rehabilitación, alugueiro…). Finalmente, reclaman que dende o Concello se impulsen coloquios e obradoiros sobre rehabilitación de edificios.

Dende o grupo de Agroma Sober consideran que o estado de moitas vivendas supón un risco para as persoas e para outras edificacións. Destacan que se trata dun problema crecente no rural en despoboamento, e sinalan que Galicia é a comunidade cunha maior porcentaxe de vivendas en estado ruinoso, malo ou deficiente cun 11% do total.

Doutra banda, cren que o Concello ten mecanismos para divulgar as técnicas e posibilidaes de rehabilitación, un procedemento máis eficiente, barato, ecolóxico e respetuoso co entorno ca unha edificación de nova construción.