Xornadas de bioconstrución centradas na arquitectura autóctona

Desenvolveranse os días 13, 14 e 15 de setembro na Finca San Xoán de Tor, anexa ao Pazo de Tor en Monforte, están organizadas por 'Espiga, Asociación galega para a bioconstrución', e nesta VI edición xirarán ao redor da arquitectura vernácula e os seus oficios.

Pazo de Tor / turismo.ribeirasacra.org

O interese da asociación organizadora para impulsar estas xornadas é o de visibilizar, apoiar e reunir nun gran evento aos profesionais existentes no eido da bioconstrución e concienciar á sociedade dunha construción máis responsable dende o punto de vista social, cultural ou ambiental.

O tema deste ano é a arquitectura vernácula e os seus oficios entendendo dende a organización que a base da bioconstrución é a arquitectura autóctona, unha arquitectura onde prima o uso de materiais locais, o coñecemento do lugar a nivel topográfico, climático e cultural, as técnicas tradicionais, o xeito de vivir… un legado en moitas ocasións esquecido e non respectado en algunhas intervencións actuais.

Haberá interesantes conferencias contando, por exemplo, o sábado pola mañá coa presenza de Fermin Font, especialista no sistema construtivo da tapia, da terra compactada. Pola mañá dará unha conferencia sobre a técnica e pola tarde realizarase unha mostra. Outros nomes destacables nas xornadas son Luís Prieto e Manuel Navarrete, ambos premios Nacional Richard H. Driehausa ás Artes da Construción.

No programa, ademais de charlas, táboas redondos e obradoiros, proxectarase un documental o venres 13 pola noite, haberá xogos tradicionais –bolos celtas- e un concerto musical o sábado 14 de setembro ás 23:00 h.  O evento realizarase no Pazo de Tor –a uns 8 quilómetros preto de Monforte- onde haberá zona de acampada libre, a posibilidade de gozar de “eco-comidas” e actividades para os pequenos.

A asociación a Espiga anima a construtores, institucións e interesados na materia a participar nas xornadas. Segundo eles “será un bo punto de encontro para aprender, debater e reflexionar sobre a conservación dos muros que conforman unha boa parte dos inmobles do val de Lemos”.

DEIXAR UN COMENTARIO

Please enter your comment!
Please enter your name here