O servizo de rutas fluviais en catamarán pola Ribeira Sacra, impulsado pola Deputación de Lugo, amplía ata o 90 por cento a súa capacidade máxima desde este sábado tras o cambio das normas sanitarias publicado o venres no Diario Oficial de Galicia (DOG).
Con todo, a institución provincial apunta que “se manterán vixentes as restantes medidas de prevención e contención” da covid-19 como as distancias, o uso da máscara, a hixiene de mans e a desinfección das embarcacións.
A Deputación de Lugo espera que a ampliación do número de viaxeiros nos catamaráns contribúa a “aumentar o efecto multiplicador” que ten este servizo turístico na economía da Ribeira Sacra, “sobre todo na hostalaría e no comercio”.
No que vai de tempada, desde que arrincou en marzo, máis de 26.000 persoas asistiron a estas rutas turísticas, 16.000 durante o verán.
As persoas que o desexen poden reservar o seu billete na páxina ‘reservas.rutasembalses.es’, contactar no correo electrónico catamaranes.turismo@deputacionlugo.org ou chamar ao 982 260196 en horario de luns a venres, de 09,00 a 14,30 horas.