Agroma Sober considera que a situación do Hospital debe ser tratada nos plenos da área do sur de Lugo para defender nas zonas do interior galego os mesmos servizos que outros hospitais. Segundo apunta a formación política a perda da neuróloga no centro hospitalario non fixo máis que engrosar as listas de agarda. A este respecto reclaman coñecer os datos reais e un plan para reducilas ata a súa eliminación e piden que o Pleno se posicione a favor da praza de neuroloxía no Hospital.
Por outra parte, por mor da pandemia provocada polo coronavirus, os Centros de Saúde, coma o de Sober, teñen limitado o aforo da sala de espera. Motivo polo que cando hai picos de afluencia, “como no momento de facer analíticas pola mañá, a xente ten que agardar fóra do edificio”; sinalan.
“Na contorna do Centro de Saúde de Sober non hai bancos nin suficientes espazos con sombra ou para cubrirse da choiva, polo que as agardas nos días de calor ou de mal tempo poden facerse moi difíciles, especialmente para persoas máis maiores.” A este respecto Agroma Sober pide ao concello e Xunta colaboren para mellorar no inmediato o entorno do Centro de Saúde, colocando bancos que permitan manter as distancias, zonas de sombra e antichoiva suficientes e marcas no chan para gardar as distancias interpersoais na agarda.
