Tal como publica o Diario Oficial de Galicia na súa edición deste luns, concedéronse subvencións ás entidades locais para o financiamento de actuacións en materia de residuos de competencia municipal, ó abeiro dunha convocatoria da Consellería de Medio Ambiente, Territorio e Vivenda da Xunta de Galicia, dotada cun orzamento total que supera os catro millons de euros.
O Concello de Chantada non solicitou esta axuda segundo informan desde o PSOE de Chantada. A xuizo do Grupo Socialista “deixar pasar as convocatorias de subvencións está a ser demasiado habitual por parte do goberno local, e tendo en conta ademáis as gravísimas necesidades que temos en Chantada en distintos ámbitos”.
Aseguran os socialistas que “Esta deixadez no ámbito da xestión de residuos contrasta coa proliferación de verquidos incontrolados no termo municipal. Deste xeito, na pasada sesión ordinaria do Pleno, o Grupo Municipal Socialista veu de denunciar a existencia dun verquido incontrolado nas proximidades do Santuario de Fátima. E esta pasada fin de semana foron testemuñas da existencia doutro nas proximidades do Polígono Industrial dos Acivros.“