“Proxectos que repercutan na veciñanza e non no peto do alcalde”, demanda o PSOE de Bóveda

A voceira socialista de Bóveda, Carmen Macía, fala do cúmulo de casualidades que detecta nas subvencións do Concello para a construción de novas vivendas na vila, impulsadas polo propio Concello, "das cales o alcalde é o primeiro beneficiario," asegura.

Concello de Bóveda / XdL

O pasado mes de marzo o alcalde de Bóveda anunciou que o Concello ía subvencionar o 100% do imposto de construción para a rehabilitación interior e exterior, reconstrución ou construción de obra nova en vivendas unifamiliares. “Resulta bastante casuístico, que tres meses despois deste anuncio o propio Alcalde presente un proxecto para a realización dunha nova construción na vila. A través da acta da Xunta de Goberno Local do día 24 xuño comprobamos que o rexedor vaise beneficiar dunha axuda económica, impulsada polo Concello para a contratación da súa nova vivenda por un importe de 3.500 euros”, advirten.

Lembran os socialistas que o alcalde anunciaba esta medida enfocada en investir e fixar poboación e na mellora de calidade dos veciños. Agora os socialistas aseguran que a calidade de vida que se mellora neste caso é a do alcalde, “que dun proxecto orzamentado en 140.000 euros, vai aforrar 3.500 euros das arcas municipais”, insisten.

Carmen Macía emprazou ao rexedor a impulsar iniciativas e proxectos que repercutan na veciñanza, “e non no peto do Alcalde”. “Estamos dacordo en que o noso Concello precisa medidas e propostas para fixar poboación, como calquera Concello da provincia, pero non deste xeito”, resumiu.

DEIXAR UN COMENTARIO

Please enter your comment!
Please enter your name here