A fin de semana que se fixo o acendido oficial das luces de Nadal en Vigo tamén se fixo na Seara, aldea de Quiroga, en pleno Courel. Fíxose dun xeito simbólico e para reivindicar que no rural tamén son quen de celebrar estas datas dun xeito máis enxebre e menos ostentoso. Na celebración estiveron presentes, ademais dos veciños/as e algúns visitantes, o alcalde e o concelleiro de Medio Rural de Quiroga. Fíxose un magosto popular e incluso houbo bombas de palenque para a ocasión.

“Nada que ver con Vigo nin ganas”, dinnos uns veciños e veciñas que están rematando de engalanar esta aldea quiroguesa no comezo da ponte da Constitución. A aldea ten practicamente todas as casas rehabilitadas e en fins de semana, pontes e vacacións énchese de xente.

Estes días hai moito ambiente pola ponte, os moradores de fin de semana aproveitan a ocasión, hai grupos de sendeiristas, visitantes de paseo e xente no albergue. O Mesón Carrete está a tope para comer, vemos que hai tempo de espera para poder xantar e dinnos alí que estes días “traballan a tope” e que hai moita xente de fóra.

A Seara xa é fermosa de seu, unha das xoias do Courel quirogués, pero estes días ten unha decoración especial, moi orixinal e con detalles que lembran, por exemplo, a dúas figuras características destes lares: O Apalpador e o Oso. Adornos e detalles engalanan a aldea dun xeito moi coidado, non invasivo e converten o lugar nunha auténtica postal.

Paga a pena facer unha escapada para gozar coas marabillas da arquitectura rural de montaña da zona e a fermosura da súa contorna natural: as montañas que acobillan o val, os saltos de auga e as pozas do río Selmo ao seu paso polo medio da Seara, os seus sendeiros naturais, fervenzas como a do Fócaro -a poucos metros do lugar e camiño da Lagoa de Lucenza- En fin, moito que ver e moito que vivir se a estancia é máis prolongada.