O Concello do Incio vén de recibir unha resolución pola que se estima favorable a solicitude de axuda para a renovación de instalacións de iluminación exterior no conxunto do municipio. A subvención concedida polo Instituto para la diversificación y el ahorro de la energía (IDAE) para a renovación no alumeado público exterior consiste na renovación das luminarias existentes (VMCC e VSAP) por luminarias LED máis eficientes. Substituiranse 1.154 e actuarase en 64 dos 95 cadros de mando para adaptalos á normativa vixente.
Con esta actuación diminuirá a potencia contratada de 70,11 kW a 39,29 kW, conseguíndose un aforro enerxético estimado do 62,02%.
O investimento total no proxecto ascende a 522.478 euros, dos que o IDAE achega un importe máximo de 417.982,40 euros ao amparo das subvencións a proxectos singulares de entidades locais que favorezan o paso a unha economía baixa en carbono. A contía restante correspóndelle pagala ao Concello.
O alcalde, Héctor Corujo, subliña a importancia de ter acadado esta subvención, posto que vai permitir a renovación da iluminación en todo Concello, ao tempo que suporá un importante aforro na factura que se viña pagando polo consumo de luz pública.
