Actividades en Bóveda para celebrar o 8M

O Concello de Bóveda organiza diferentes actividades para conmemorar o 8 de marzo, Día Internacional da Muller. Obradoiros, exposicións e proxeccións compoñen a programación que comeza o día 6 de marzo.

Concello de Bóveda / XdL

O venres 6 de marzo celebrarase o obradoiro ‘Ilustración con teas. Arte e igualdade’ pensado para nenos e nenas de 4 a 12 anos. Será ás 15:30 horas no Centro Sociocultural. Esta actividade enmárcase no Pacto de Estado contra a Violencia de Xénero. Tamén o venres de 17:30 a 19:00 proxectarase ‘Figuras ocultas’ de Theodore Melfie baseada nunha historia de tres mulleres matemáticas afroamericanas que nos anos 60 traballaron para a NASA e participaron activamente na carreira espacial mentres loitaban polos dereitos civís da xente de cor.

O luns 9 de marzo inaugurarase a exposición bibliográfica ‘Muller e feminismo na Biblioteca de Bóveda’. Este mesmo día O Concello de Bóveda vai participar no acto de entrega do conto ‘Inés Fernández, unha muller para o oito de marzo’ organizado polo CIM e o colectivo Lemos Le no Centro Cívico de Monforte. Os alumnos de 5º e 6º do Colexio Público Rosalía de Castro participaron na ilustración do volume.

Por último, o xoves 12 de marzo ás 16:30 horas na ocioteca levarase a cabo a confección dun mural colectivo ‘A mirada de xénero desde a educación infantil’.

O alcalde de Bóveda, José Manuel Arias, destaca que todas as actividades están encamiñadas a concienciar sobre a importancia da igualdade, polo que están dirixidas a todos os públicos desde a infancia á idade adulta. Todas elas se levarán a cabo no Centro Sociocultural de Bóveda, agás a do Centro Cívico de Monforte.

DEIXAR UN COMENTARIO

Please enter your comment!
Please enter your name here