O dispositivo de procura localizou no río o corpo do octoxenario desaparecido hai unha semana no municipio do Páramo (Lugo). Así o confirmou a Europa Press o alcalde do Páramo, José Luis López, quen manifestou que o corpo apareceu sobre as 19,15 horas deste martes.

A procura centrouse no río e foi localizado por efectivos de Protección Civil e da Garda Civil, que buscaban nunha embarcación. O rexedor manifestara esta xornada que, no caso de que a procura non obtivese resultado entre hoxe e mañá, como finalmente si sucedeu, o xoves estaba previsto pedir que mergulladores do Grupo Especial de Actividades Subacuáticas da Garda Civil ( GEAS) realizaran de novo inmersións para continuar o rastrexo dentro do río.

O octoxenario desaparecido, José V. C., veciño de Quintela de San Vicente, saíu sobre as 16,00 horas do pasado martes 14 de abril a pasear na contorna da súa vivenda. Foi a súa muller, coa que reside, a que alertou da súa desaparición ao non regresar.