A primeira Xunta de Goberno da Deputación desde o estado de alarma, aprobou a adxudicación de traballos en estradas provincias e infraestruturas por case 743.000€, en catro concellos da provincia. As actuacións desenvolveranse nos municipios de Monforte de Lemos, Sober, Guitiriz e Castro de Rei.
No concello de Monforte de Lemos aprobouse a adxudicación da obra de acondicionamento da estrada de acceso ao Pazo de Tor, a LU-P-3207, nun treito de 3,3 quilómetros, por 477.830,36€. As actuacións consisten na ampliación da pista existente que accede ó Pazo, nunha lonxitude de 600 metros, entre os puntos quilométricos 2,7 e 3,3. Ademais, dotarase, tanto ao enlace coa LU-617 como a todo o tramo completo de máis 3 quilómetros, do pavimento definitivo a base de mestura asfáltica en quente. A actuación dentro da finca consistirá nun novo vial ata o aulario, con novos accesos, unha rotonda para cambiar o sentido da circulación e estacionamentos para coches e autobuses. As obras terán un prazo de execución de 6 meses e está previsto que poidan comezar no verán.
No concello de Sober tamén se adxudicou a obra de rehabilitación do firme da estrada LU-P-5902, por importe de 61.347€. As obras realizaranse nesta vía que conecta o núcleo de Canaval con Rosende e Arxemil, entre os quilómetros 3,5 e 4,5. Os traballos consisten na reapertura de cunetas, pavimentación co estendido dunha capa de mestura bituminosas en quente sobre o firme existente e sinalización horizontal. Estas obras contan cun prazo de execución de 6 meses.
Plan de aforro enerxético nos concellos ILUMIN@
A Xunta de Goberno deste venres deulle o visto e prace á contratación por lotes do servizo de asistencia técnica ao responsable do contrato da subministración e instalación de material eléctrico de iluminación con material LED para o plan de aforro enerxético nos concellos que impulsa a Deputación, ILUMIN@. Esta iniciativa está cofinanciada nun 80% polos fondos FEDER, asumindo a institución provincial o 20% restante.
Este contrato ascende a 15.270 € e divídese por lotes, en función das áreas xeográficas da provincia. No Lote 3 integra os concellos da Pobra do Brollón, As Nogais, Carballedo, Folgoso do Courel, Monforte de Lemos, O Incio, O Páramo, O Saviñao, Pantón, Quiroga, Samos e Sober, por importe de 4.907,76€.
