A Mariña aumenta cada día os infectados por Covid19, a provincia suma xa 64 casos

Este xoves, 2 de xullo, a provincia de Lugo conta con 64 casos activos de coronavirus, dos que 47 correponden á Mariña, con 12 casos máis ca onte.

Hospital Público da Mariña. TWITTER/Q. M.

Dos 47 positivos da Mariña, a maioría son asintomáticos ou presentan síntomas de carácter leve, e teñen a obriga de gardar corentena durante 14 días.

Polo de agora, o número de ingresados por Covid-19 no Hospital Público da Mariña mantense. As dúas persoas hospitalizadas relacionadas co brote fican en planta e con evolución “favorable“, segundo a Consellería de Sanidade, mentres o HULA mantén outro ingresado.

O primeiro caso de infección por Covid-19 no rebrote da Mariña detectouse, segundo a Consellería de Sanidade, na tarde do martes 23 de xuño, nun núcleo familiar do concello de Xove. Ao longo dos últimos días aumentou a cifra de contaxiados segundo se foron realizando probas aos contactos dos primeiros infectados, con tres focos principais nos municipios de Xove, Burela e Foz.

E o rebrote da Mariña podería ser a orixe dun novo caso en Asturias onde o presidente do Principado anunciaba este xoves o primeiro caso de coronavirus en 20 días.

61 dos diagnosticados na provincia pasan o confinamento en domicilio, mentres a provincia contabiliza xa 1.017 casos desde a orixe da pandemia, entre altas e falecementos. O Sergas informa en Galicia de 317 casos positivos.

DEIXAR UN COMENTARIO

Please enter your comment!
Please enter your name here