O pasado 8 de novembro conmemorouse no castelo de Soutomaior (Pontevedra) o Día das Escritoras co obxectivo recuperar o legado das mulleres autoras e editoras ao facer visible o seu traballo na literatura e combater a discriminación sufrida ao longa da historia. Nesta conmemoración, na que participaron mulleres autoras e editoras galegas, asinouse o  “Manifesto de Soutomaior”.

Neste manifesto denúncianse as diferentes situacións de desigualdade que existen no mundo da escrita e proponse un plan de acción para rachar con elas, recollendo doce decisións que deben servir de referencia futura para conseguir a igualdade na creación e na produción artística e intelectual.

Entres estas decisións está a de esixir que se cumpra o principio de igualdade de trato e de oportunidades entre mulleres e homes en todo o concernente á creación e produción artística e intelectual e a súa difusión. Esixir a paridade nos xurados dos premios literarios e nas edicións de antoloxías e de compilacións de obras literarias. Esixir o recoñecemento das obras das escritoras galegas e da súa traxectoria literaria, a inclusión obrigatoria das escritoras galegas e as súas obras nos plans de estudo dos centros educativos. Ou a de esixir que as cadeiras ocupadas nos vindeiros dez anos na Real Academia Galega o sexan por mulleres e que nos próximos dez anos o Día das Letras Galegas homenaxee as mulleres.

Coa firma deste manifesto, o Concello de Quiroga, quere apoiar estas decisións que servirán para conseguir a igualdade de oportunidades na creación artística e intelectual, comprometéndose a facilitar e impulsar accións e medidas para romper coa desigualdade de xénero no mundo editorial e literario galego.