A celebración da 3ª Festa do Peregrino dará comezo ás 11:30 horas coa apertura dos postos de artesanía na Praza da Deputación e animación na rúa a cargo do grupo Gaitas Xiada e Panderetas Xiadiña.

Ás 12:00 horas farase a inauguración da exposición ‘Cova Eirós’ na Fonte do Lunar. Ás 12:30 horas levarase a cabo a presentación do libro da autora local, Mirella López Díaz, ‘Breicar en el Camino de Santiago’.

De seguido, Manuel F. Rodríguez pronunciará o seu pregón ás 13:00 horas. O Goberno local destaca do pregoeiro a dilatada traxectoria de promoción cultural, asociacionismo e investigación e, sobre todo, o seu traballo a prol da promoción e mantemento do Camiño de Santiago a través da súa participación na xestión do Plan Xacobeo.

Ás 16:00 horas será quenda do obradoiro creativo ‘Escultura Kaos’ e ás 17:00 horas levarase a cabo o taller de impresión de papel ‘Amorote’.

Ás 19:00 horas haberá un espectáculo de títeres tradicionais, ‘Dona barriga verde’ a cargo de Larraitz Urruzola. A xornada remata coa actuación musical da banda de rock ‘Sound Sisters’.

A rexedora, Olga Iglesias, anima a participar neste evento que pretende ”manter viva a chama do Camiño Francés” e enxalzar ”a tradición xacobea de Triacastela, final de etapa dende o Códice Calixtino. Vai ser unha homenaxe ao Camiño e a todas as persoas relacionadas con el, tanto as da localidade como as que cada ano chegan ata Triacastela”, afirma. Destaca ademais a importancia de contar cun programa pensado para todos os públicos e de todas as idades.